Hjartaómun af fóstri

07.10.2008

Sælar og takk fyrir frábæran vef!

Ég er gengin 22 vikur með mitt fyrsta barn og gengur bara vel. Þegar ég fór í 20 vikna sónar var mér sagt að það væri í boði fyrir mig að fara í hjartaómun þar sem ég fæddist sjálf með opið milli hólfa. Hún sá ekkert óeðlilegt í sónarnum en við vildum láta athuga málið til að vera alveg viss. Ég á pantaðan tíma í þessum mánuði og var að velta því fyrir mér hvort þið gætuð frætt mig betur um þessa skoðun. Hvernig hún fer fram og hvar og einnig hvort þetta sé hluti af mæðravernd eða ber ég sjálf kostnaðinn? Vona að þetta sé ekkert til að vera smeyk við.

Með fyrirfram þökkum.


Sæl!

hjartaómun af fóstri er framkvæmd á sama hátt og 20 vikna skimunin sem þú fórst í. Hún er hins vegar framkvæmd af barnahjartalæknum sem skoða einungis hjartað og nota til þessi sérstakan ómhaus sem er minni en notaður er við 20 vikna ómunina. Skoðunin fer fram á Barnaspítala Hringsins á fyrstu hæð, og er þér að kostnaðarlausu.

Kær kveðja og gangi þér vel,

María Jóna Hreinsdóttir,
ljósmóðir - deildarstjóri fósturgreinardeildar LSH,
7. október 2008.