Spurt og svarað

28. nóvember 2011

Hnútur á naflastreng

Góðan dag!

Ég var að komast að því að ég er ófrísk.Við hjónin vorum búin að ákveða að eignast ekki fleiri börn. Ég varð ófrísk á svipuðum tíma í fyrra og eftir 14 vikna meðgöngu uppgötvaði ég að fóstrið væri látið og hafði það gerst nokkrum dögum áður. Orsökin var hnútar eða hnútur á naflastrengnum og fóstrið fékk litla næringu, einnig var strengurinn óvenju langur eða rúmir 20 cm. Þegar læknirinn sagði okkur orsakir fósturlátsins sagði hún okkur einnig að líkurnar á að þetta myndi gerast á næstu meðgöngu væru örlítið hærri hjá okkur en hjá þeim sem hefðu ekki lent í þessu. Það var svona lokahnykkurinn á því að eignast ekki fleiri börn. En til þess að gera langa sögu stutta, þá er ég komin um það bil 5-6 vikur núna og er komin yfir sjokkið og tek þetta allt saman í sátt, en hef áhyggjur sökum síðustu meðgöngu. Er hægt að fylgjast náið með fóstrinu og strengnum eða sést þetta kannski ekki sónar?

Með fyrirfram þökk.



Sælar!

Hnútar á naflastreng eru ekki óalgengir og sérstaklega ef naflastrengurinn er langur. Ofast eru þeir ekki mjög fastir og valda þá engum skaða, en ef hnútarnir eru þéttir getur það haft áhrif á blóðflæðið í strengnum sem getur valdið dauða hjá fóstrinu. Langur naflastrengur getur endurtekið sig í næstu meðgöngu hjá sömu konu, en langbest er að þú hafir samband við lækninn sem talaði við þig eftir fósturlátið og hann mun skipuleggja eftirlit fyrir þig í þessari meðgöngu.

Kær kveðja,

María Hreinsdóttir,
ljósmóðir fósturgreiningardeild,
28. nóvember 2011.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.