Spurt og svarað

16. júlí 2008

Hraður hjartsláttur

Sælar ljósmæður og takk fyrir góðan vef.

Mig langar til að spyrja ykkur um eðlilegan hjartslátt á meðgöngu. Er núna ófrísk af mínu þriðja barni komin 27 vikur og er alltaf (mjög oft)með svo hraðan hjartslátt. Er yfirleitt með púls yfir 90 slög á mínútu og fer hann alveg upp í 115-120 sl á mín. Þetta gerist meira að segja þegar ég er ekkert sérstakt að gera, bara að slappa af. Einnig svimar mig oft,veit að ég er ekki blóðlítil, búin að láta athuga það. Er þetta eðlilegt? Man ekki eftir svona á síðustu meðgöngum.

Með von um svar sem fyrst.

Kveðja, Guðrún.


Sæl Guðrún og þakka þér fyrir fyrirspurnina.

Eðlileg tíðni hjartsláttar í hvíld hjá konu sem er ekki barnshafandi er 60 - 90 slög á mínútu. Tíðni hjartsláttar eykst á meðgöngu vegna aukningu á vökvarúmmáli í æðum. Á meðgöngu þarf líkami móðurinnar að sjá til þess að flytja aukið magn súrefnis til vefjanna til þess að fóstur geti þroskast eðlilega. Hjartað þarf að auka hraða sinn til þess að ráða við þetta aukna vökvarúmmál og finna konur oft fyrir þessari breytingu eins og þú lýsir. Tíðni hjartsláttar í hvíld eykst að jafnaði um 15-20 slög á mínútu á fyrstu tveimur þriðjungum meðgöngunnar og getur aukist enn frekar á þriðja þriðjungi meðgöngunnar. Konur sem hafa gengið með barn áður og þær sem ganga með fleira en eitt barn finna meira fyrir þessari aukningu. Í fræðunum er þess einnig getið að konur finni frekar fyrir þessu ef þær hafi ekki stundað reglulega líkamsrækt fyrir meðgönguna. Það er ekki óeðlilegt að þú finnir fyrir þessari aukningu á hjartslætti með svimatilfinningu.

Gangi þér vel.

Ingibjörg Th. Hreiðarsdóttir,
ljósmóðir og hjúkrunarfræðingur,
16. júlí 2008.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.