Spurt og svarað

14. apríl 2010

Agel á meðgöngu

Er í lagi fyrir ófrískar konur að taka inn Agel. Ég er þá sérstaklega að velta fyrir mér FLX vörunni.


Sæl!

Á vefsíðu Agel kemur fram að það eru efni í Agel EXO sem hafa verið flokkuð sem óæskileg á meðgöngu og því er barnshafandi konum ekki ráðlagt að nota EXO á meðgöngu. Á vefsíðunni WhyAgel er varað við notkun Agel FLX vegna þess að það hafa ekki verið gerðar neinar rannsóknir á mörgum innihaldsefnunum m.t.t. áhrifa þeirra á meðgöngu. Agel FLX inniheldur líka Chondroitin sem líkist efnafræðilega blóðþynningarlyfinu heparín.

Það eru ekki alltaf svona aðgengilegar upplýsingar um náttúruafurðir og heilsuvörur sem eru á markaði en margir telja að afurðir sem teljast hreinar náttúruafurðir séu með öllu skaðlausar en það er víst langt frá því. Vissulega geta margar svokallaðar heilsuvörur haft góð áhrif á ákveðin vandamál en á sama tíma getur þessi sama afurð haft slæm áhrif á aðra starfsemi í líkamanum eða komið ójafnvægi á líkamsstarfsemina. Hér er gott dæmi um vöru sem ef til vill getur linað liðverki og gigt en ef til vill komið ójafnvægi á blóðstorkukerfið. Það er með náttúrulyf eins og önnur lyf að það þarf að vega og meta ávinning af því að taka inn lyfið til móts við þá áhættu sem það getur falið í sér.

Ef þú ert með einkenni sem þarfnast lyfjameðferðar, hvort sem það eru hefðbundin lyf eða náttúrulyf þá er best að ráðfæra sig við lækni.

Kveðja,

Anna Sigríður Vernharðsdóttir,
ljósmóðir og hjúkrunarfræðingur,
14. apríl 2010.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.