Koffín og Aspartame

14.01.2009

Halló!

Langaði svo að fá upplýsingar sambandi við diet drykki. Ég er komin 5 mánuði á leið og allt gengur eins og í sögu. Ég hef svolitlar áhyggjur af hvað ég drekk mikið að Diet Pepsi. Ég drekk um ½ til 1 líter á dag en drekk ekki kaffi og passa mig að drekka nóg vatni og nóg af mjólk. Ég hef ekki séð neitt voðalega slæmt sambandi við aspartamið þarf að innbyrða heil ósköp til að það sé skaðlegt. Veit ég á bara að minnka þetta en hef átt erfitt með þetta hingað til. Borða annars hollan mat og hreyfi mig mikið.

Takk fyrir.

Kveðja, Edda.


Sæl Edda og takk fyrir að senda okkur fyrirspurn.

Auðvitað er best að sleppa því að drekka gos almennt en líklega er ekki skaðlegt að drekka ½ til 1 líter á dag, jafnvel á meðgöngu. Það eru nokkur atriði í samband við hugsanlega skaðsemi gosdrykkju sem mig langar að velta hér upp.

Sykur eða sætuefni
Ef gosið er með sykri þá inniheldur það auðvitað mikla næringarlausa orku sem fæstir hafa þörf fyrir og þá er hætta á að þyngjast of mikið. Ef gosið er sykurlaust þá inniheldur það sætuefni í staðinn. Það er sennilega í lagi fyrir okkur að neyta þeirra og jafnvel á meðgöngu. Í þessu sambandi langar mig að vísa í umfjöllum um Aspartame hér á vefnum okkar svo og svar við spurningunni: Hvaða skaðleg áhrif hefur sætuefnið aspartam á líkamann? á Vísindavef Háskóla Íslands.

Koffín
Það er ekki vitað með vissu hvaða áhrif koffín hefur á fóstrið. Rannsóknir hafa þó sýnt að óhófleg neysla á koffíni getur aukið líkur á fósturláti, fyrirburafæðingu og lágri fæðingarþyngd barns en hófleg neysla á koffíni virðist ekki vera skaðleg á meðgöngu. Ein rannsókn sýndi að börn mæðra sem neyttu meira en 500 mg af koffíni á dag á meðgöngunni voru meira vakandi og höfðu hraðari hjartslátt fyrstu dagana eftir fæðingu en önnur börn. Koffín fer yfir fylgjuna til barnsins en ef miðað er við neyta ekki meira en 200 mg af koffíni daglega þá ætti fóstrinu líklega ekki að vera hætta búin.  Koffín er vissulega örvandi efni sem eykur hjartsláttartíðni og efnaskiptahraða og getur valdið svefnleysi, óróleika og höfuðverk. Koffín getur einnig aukið brjóstsviða vegna örvunar á framleiðslu magasýra. Koffín hefur þvagræsandi áhrif að sem þýðir einfaldlega að þú þarft að pissa oftar því líkaminn er að losa sig við vökva og þar af leiðandi er meiri hætta á ofþornun. Samfara þessari vökvalosun tapar líkaminn einnig kalki.  Það er því ljóst að koffín hefur margvísleg áhrif í mannslíkamanum en eins og áður segir ætti að vera óhætt er drekka kaffi, te og gos í hófi. Það er auðvitað hægt að velja gos sem inniheldur ekki koffín.

Fosfór
Gos inniheldur talsvert mikið af fosfór en ofgnótt fosfórs getur hindrað upptöku kalks sem er mikilvægt að ekki skorti á meðgöngu.

Tennurnar
Það hefur verið mikið fjallað um skaðsemi gosdrykkjaneyslu á tennurnar svo ég ætla ekki að fjalla um það hér en vísa hér á umfjöllun um glerungseyðingu tanna á vef Landlæknisembættisins.

Eins og þú sérð á þessari umfjöllun þá er nú betra að drekka bara vatn en sennilega er í góðu lagi að drekka gos í hófi.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
14. janúar 2009.

Leitarorð: Koffín, Koffein, Aspartam, Asparteme, sætuefni, gos, kaffi, te