Spurt og svarað

14. febrúar 2008

Lakkrís og hætta á fyrirburafæðingum

Sælar!

Ég var að lesa á netinu að lakkrísneysla á meðgöngu geti valdið fyrirburafæðingu og fósturgöllum hjá strákfóstrum. Er þetta eitthvað til að hafa áhyggjur af, eða gildir þetta bara ef um „baðker“ á dag er að ræða?

Ég hef hvergi rekist á umræðu um þetta hér á landi. Borgar sig ekki að sleppa alveg lakkrísáti? Þetta virtust vera nokkuð afgerandi rannsóknarniðurstöður hvað fyrirburafæðingarnar varðaði a.m.k.


 Sæl og blessuð!

Fyrir nokkrum árum birtist rannsókn sem gerð var í Finnlandi sem bendir til þess að konur sem borða mikið af lakkrís séu í meiri hættu á að fæða fyrir tímann. Upphaflega fór þessi rannsókn af stað til að kanna hvort lakkrísneysla hefði áhrif á fæðingarþyngd en það reyndist ekki hafa nein áhrif á hana. Í rannsókninni kom hins vegar í ljós að konur sem borðuðu meira en 250 grömm af lakkrís á viku voru helmingi líklegri til að fæða fyrir tímann (< 37 vikur) en þær sem borðuðu minna en sem svarar 125 grömmum á viku. Þessar niðurstöður gefa vissulega vísbendingu en það er þó ekki hægt að fullyrða neitt út frá þessum niðurstöðum þar sem upplýsingum um lakkrísneyslu var safnað eftir á og það þykir ekki vera nægjanlega áreiðanleg rannsóknaraðferð.  Hins vegar er þetta ekki út í hött því fræðilega séð getur lakkrís aukið myndun prostaglandína og þannig flýtt fyrir fæðingu.

Ég fann ekkert um lakkrísneyslu og fósturgalla en þú mátt gjarnan senda mér upplýsingar um hvar þú last þetta og þá skal ég skoða það nánar.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
14. febrúar 2008.

 

 

 





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.