Spurt og svarað

Ég er með 10 mánaða barn á brjósti sem býst við að verði það áfram í 1-2 ár í viðbót.

Læknir var að mæla með að ég færi í stoðkerfisaðgerð en eftir hana þarf ég að taka parkodin í viku sem skv. lyfseðli má ekki taka með barn á brjósti. Er eitthvað annað sambærilegt verkjalyf sem má taka með brjóstagjöf? Eða þarf ég bara að fresta aðgerð þar til barnið er hætt á brjósti? Að pumpa á undan og gefa barni á meðan og svo pumpa á meðan er á verkjalyfjum til að viðhalda framleiðslu væri ekki góð lausn því barnið sýgur brjóstið til að róa sig og svæfa svo sogið sjálft á brjóstinu er ekki síður mikilvægt fyrir barnið en mjólkin sjálf.

Fyrirfram þakkir!

Góðan dag og takk fyrir fyrirspurnina,

Það er ekki ráðlagt að taka inn Parkodin á meðgöngu til lengri tíma. Það er spurning hvort Paracetamol myndi nægja (í lagi að taka með brjóstagjöf), en það fer eftir aðgerð og hvernig líðan er eftir aðgerð. Ég myndi ráðleggja þér að meta verkjastillingu með þeim lækni sem framkvæmir aðgerðina með tilliti til þess að verkjalyfin fari með bjróstagjöfinni. Gangi þér sem allra best.

Bestu kveðjur, Ilmur Björg, ljósmóðir.

Góðan daginn,

Ég er bara komin 9 vikur og 2 daga og hef átt hrikalega erfitt með svefn. Það er ég næ ekki góðum svefni. Næ að sofna en gæði svefnsins er ekki góður sem er farið að hafa áhrif á bara heilsu almennt. þetta er ekki vandamál sem ég hef átt við annars. Er bara að velta fyrir mér hvort eitthvað væri til sem væri öruggt að taka til þess að ná betri svefni eins og melatonin?

Kær kveðja

Góðan dag og takk fyrir fyrirspurnina,

Hér er upplýsingar um einfalda hluti sem geta bætt svefn og svefnrútínu. Ég hvet þig til að skoða listann og athuga hvort eitthvað á listanum getur ýtt undir betri svefngæði hjá þér. Ef engin ráð virka og svefninn er áfram slæmur væri sniðugt að hafa samband við ljósmóður í meðgönguvernd og meta aðstoð með lyfjameðferð. Gangi þér sem allra best.

Bestu kveðjur, Ilmur Björg, ljósmóðir.

Hæhæ,
Ég er með undirliggjandi Carpal Tunnel sem hefur ágerst gífurlegar núna síðustu 2 vikur og ég er komin 37 + 4 . Ég sef ekki nema 2klst í senn og er með rosalegan taugaverk og náladofa í báðum höndum og er alveg að bilast á að ná ekki að hvíla mig.

Er í lagi fyrir mig að fá Cortistol sprauti í úlnliðina til að hjálpa mér?

Góðan dag og takk fyrir fyrirspurnina,

Hér eru upplýsingar um meðferð við Carpal Tunnel á meðgöngu.

Ef þú hefur áður fengið kortison sprautu gætir þú haft samband við gigtarlækni til að meta ávinning og áhættur af meðferðinni.

Gangi þér vel.

Bestu kveðjur, Ilmur Björg, ljósmóðir.

Sæl veriði ég hef mikið verið að mæta í heita tíma og pilates í heitum sal og var að komast að því að ég væri komin 6 vikur á leið er alveg öruggt að halda áfram að mæta í þessa tíma?

Góðan dag og takk fyrir fyrirspurnina,

Almennt er ekki ráðlagt að æfa í heitum sölum á meðgöngu. Sumir sem eru vanir að æfa í heitum sölum halda því áfram en þá er ráðlagt að huga vel að góðri vökvainntöku fyrir, í og eftir tímann. Einnig er mikilvægt að fara úr tímanum ef þú finnur fyrir vanlíðan og vera ekki of lengi í hitanum.

Bestu kveðjur, Ilmur Björg, ljósmóðir.

Má maður fá gervineglur þegar maður er óléttur? Svona gel/akrýl neglur sem þarf að nota UV lampa til að festa?

Góðan dag og takk fyrir fyrirspurnina,

Það ætti almennt að vera í lagi að fá sér gervineglur á meðgöngu. Þó er alltaf í góðu lagi að vera skeptískur og spyrjast fyrir um hvaða efni eru notuð.

Sniðugt er að þvo vel hendur eftir að neglur eru settar á og einnig að lofta vel um rýmið á meðan á gervineglurnar eru settar á þar sem oft eru sterk efni notuð.

Bestu kveðjur, Ilmur Björg, ljósmóðir.

Má fara í sund strax eftir að lykkjan hefur verið sett upp?

Góðan dag og takk fyrir fyrirspurnina,

Ef þér líður vel eftir uppsetningu ætti það að vera í góðu lagi. Endilega berðu það undir þann sem sem setur upp lykkjuna hjá þér.

Bestur kveðjur, Ilmur Björg Einarsdóttir, ljósmóðir.

Ég fæ svakalega krampa í kálfa og iljar á nóttunni, þannig að ég haltra daginn/dagana á efrir. Er eitthvað hægt að gera til að minnka nætur krampa? Hiti/kuldi, nudd og teygjur hafa ekki dugað.

Góðan dag og takk fyrir fyrirspurnina,

Sinadrættir/krampar á meðgögnu er algengur fylgikvilli meðgöngunnar. Í einhverjum tilvikum getur aukin inntaka magnesíum hjálpað til. Einnig getur hjálpað að fara í heitt bað, léttan göngutúr og teygja vel eftir á. Einnig hvet ég þig að drekka vel af vatni þar sem þurrkur getur aukið krampa.

Bestu kveðjur, Ilmur Björg Einarsdóttir, ljósmóðir.

Ég er venjulega með 26-28 daga tiðarhring.
Ég hef verið með aumar geirvörtur og af og til komið verkir í brjóstin. Er mjög þreytt, smá stingir neðst I kvið og niður í nára. Hef líka verið frekar tilfinningarík. Ég borða líka endalaust, er gjörsamlega botnlaus og er orðin svöng mjög fljótlega eftir mat. Ég pissa líka óvenju oft og mikið þó ég drekki ekki meira en venjulega. Ég er komin á dag 32 i tiðarhring.

Hins vegar hafa öll próf komið neikvætt. Fyrsta prófið tok eg á degi 26, þá reyndar rétt fyrir miðnætti ca 10 mín eftir að hafa pissað áður.

Seinna prófið tok eg a degi 31, þá um kl 3:30 að nóttu til, eftir ca 3 klst svefn og því um 2-3 tímar frá síðustu þvaglátum. Þvag skærgult og tært.

Bæði prófin voru neikvæð en ekkert bólar á blæðingum. Er enn möguleiki á jakvæðu prófi eða á ég að hafa áhyggjur?

Góðan daginn og takk fyrir fyrirspurnina,

Það geta verið ýmsar ástæður fyrir seinkuðum blæðingum. Ef um þungun er að ræða þá gæti verið að jákvætt próf komi á næstu dögum. Því myndi ég ráðleggja þér að taka annað próf eftir nokkra daga og nota fyrsta þvag dagsins. Ef ekkert bólar á blæðingum og óléttupróf enn neikvæð eftir 1-2 vikur gætir þú fengið tíma hjá kvensjúkdómalækni til að fá frekari skoðun.

Bestu kveðjur, Ilmur Björg Einarsdóttir, ljósmóðir.