Allt um meðgönguna

Ég á svakalega erfitt með að drekka vatn á meðgöngu, get það bara ekki án þess að kasta upp, og hef verið að setja aloe vera djús (Herbalife) út í vatn til að hafa smá bragð svo ég geti drukkið vatnið. Ég var eitthvað að googla áðan og fann rosalega misvísandi svör með hvort það sé öruggt og þá sérstaklega á fyrsta þriðjungi svo mig langaði að senda fyrirspurn hingað til að fá skýrari svör.
Er annars einhverjar aðrar góðar leiðir til þess að koma í sig vökva þegar vatn er alveg síðasta sort? Tek það fram að almennt er ég mjög dugleg að drekka vatn en það breytist eitthvað á meðgöngu og ég bara get það ekki.

Góðan dag og takk fyrir fyrirspurnina,

Stundum hjálpar að setja klaka í vatnið eða einmitt bragð/þykkni í vatnið. Það eru efni í aloe vera plöntum sem eru ekki ráðlögð inntöku á meðgöngu og því myndi ég ráðleggja þér að velja annað. Gangi þér vel.

Bestu kveðjur, ljósmóðir.

Ég var að komast að því að ég er ólétt, líklega bara komin 5 vikur á leið en mig langar svona rosalega mikið í lakkrís orðið! Er óhætt að borða það þunguð?

Góðan dag og til hamingju með þungunina,

Lakkrís er eitthvað sem allir ættu að fara varlega í að borða mikið af, þá sérstaklega á meðgöngu og/eða ef einstaklingur er með háan blóðþrýsting. Ef borðaður er lakkrís á meðgöngu er mælt með að hafa það í hófi.

Bestu kveðjur, Ilmur Björg, ljósmóðir.

Má taka adhd lyfið elevans á meðgöngu ?

Góðan dag og takk fyrir fyrirspurnina,

Ávalt er mælt með að hafa samráð við lækni (heimilislækni eða geðlækni) um áframhaldandi meðferð eða breytingu á geðlyfjum vegna þungunar. Ráðlagt er að hafa samband við ljósmóður í meðgönguvernd, heimilislækni eða geðlækni til að fá svör við þessum spurningum hvort sem þungun hefur orðið eða þú sjáir fyrir þér að þungun í náinni framtíð. Í hvert skipti er metið bæði ávinningur og áhættur lyfjameðferðar.

Bestu kveðjur, Ilmur Björg, ljósmóðir.