Ljósmóðir.is notar vafrakökur til að bæta notendaupplifun og stuðla að frekari þróun heimasíðunnar.
Upplýsingar um vafrakökur
Sælar ljósmæður Mig grunar að ég sé með Diastasis Recti, en ég átti annað barnið mitt fyrir fjórum mánuðum. Ég myndi þó gjarnan vilja fá faglegt álit á því. Getið þið bent mér á sjúkraþjálfara sem eru sérhæfðir í meðgöngu-tengdum vandamálum eða annan fagaðila sem gæti aðstoðað?
Sæl, að öllum líkindum jafnar þetta sig sjálfkrafa með tímanum, en það gæti tekið upp undir ár. Ef þú vilt láta skoða þetta ætti hvaða sjúkraþjálfari sem er að geta hjálpað þér.
Kær kveðja, Hafdís Guðnadóttir, ljósmóðir.
Sæl ljósmôðir og takk fyrir góðan vef. Ég er komin á viku 25 og er búin að vera með harðlífi og þar af leiðandi smá gyllinæð (veit að þetta er það, þvi eg hef fengið hana aður) en málið er að ég hef þurft að nota mikrolax og ég hef þurft að explora sjálfa mig til að losa. :( Er þetta eitthvað hættulegt að þurfa að gera þetta? Og eru einhver tengsl milli þess að fá harðlífi á meðgöngu og fá síðar endaþarmssig eftir fæðingu? Kv ein áhyggjufull sem þorir ekki að tala um þetta við neinn
Sæl, nei það er ekki hættulegt en ætti aðeins að nota sem síðasta úrræði þegar ekkert annað hefur virkað. Harðlífi er algengt á meðgöngu og ég mæli eindregið með því að þú ræðir við þína ljósmóður í heilsugæslunni til þess að fá viðeigandi meðferð sem hentar þér. Endaþarmssig er sjaldgæft hjá ungum konum, en helstu áhættuþættir þess eru aldur, langvarandi hægðatregða eða niðurgangur og mikil gyllinæð.
Kær kveðja, Hafdís Guðnadóttir, ljósmóðir
Eru eitthverjar reglur um að það megi ekki fara í bað snemma á meðgöngunni? Ég er mjög háð því að fara í baðkar og vona að það sé ekki þannig :)
Nei alls ekki, um að gera að fara í bað. Passa bara að baðvatnið sé ekki of heitt þannig að þér verði mjög heitt í baðinu. Gott að hafa baðvatnið sem næst líkamshita.
Sem mígrenissjúklingur nota ég rosalega mikið treo við vægum köstum, má nota treo á meðgöngu ?
Sæl, Treo inniheldur háan skammt af Asetýlsalicýlsýru eða 500 mg, því ætti að forðast að nota lyfið á fyrsta og síðasta þriðjungi meðgöngu. Ef nauðsynlegt er að taka lyfið á öðrum þriðjungi meðgöngu ættu skammtar að vera eins litlir og mögulegt er og meðferðarlegnd eins stutt og mögulegt er.
Halló Ég er með krónískt mígreni og er á lyfjum sem heita rizatriptan, ég fór til taugalæknir síðasta sumar og spurði um þessi lyf og meðgöngu og hann sagði að ég ætti ekkert að vera stressuð af nota þau á meðgöngunni en hvað segið þið ? Svona triptan lyf eru elstu mígrenis lyfin þannig það hlýtur að vera komin eitthver reynsla á þetta :)
Sæl, samkvæmt upplýsingum á vef lyfjastofnunar hefur lyfið ekki verið prófað á mönnum en dýrarannsóknir benda ekki til skaðlegra áhrifa á meðgöngu. Vegna þess að dýrarannsóknir segja ekki alltaf til um áhrif á fóstur hjá mönnum ætti aðeins að nota lyfið ef þörf krefur og í samráði við lækni.
Er hægt að vera með of mikla fólínsýru i líkamanum sínum? Er mælt með að maður fari í blóðprufu áður en maður byrjar að taka inn fólinsýru ef maður er að reyna að vera ólétt? Eða er bara í lagi að byrja að taka hana ánþess að tjekka a fólinsýruni i likamanum sinum :)? Hvort mæluru með Fólinsýra frá heilsa eða með barni frá heilsa ? fyrirframm þakkir fyrir góðann vef
Sæl, ólíklegt er að þú sért með of mikla fólínsýru í blóðinu ef þú hefur ekki verið að taka bætiefni sem inniheldur mikið magn af fólínsýru. Almennt er ekki mælt með blóðprufu áður en konur byrja að taka inn fólínsýru.
Ráðlagt er að taka inn 400 µg af fólínsýru og skiptir ekki máli frá hvaða framleiðanda fólínsýran er, svo lengi sem hún er í réttum skömmtum.